Sell屎血汗史．第一回
你有無翻過一份工，你係唔想話俾人知？
其實係好多年前，當我無再做PR後，
我翻左一份工，到今時今日，我都唔係好敢同人講我做過，
不過諗起其實份工都幾搞笑，就不如講下無傷大雅。
話說當年我做左小公關，咁岩遇著一位新入黎既衰人同事，
點衰就唔講住，因為有排講，反正唔係重點，
不過個時搞到日日都好唔開心，而且做公關真係好忙，
我記得忙到攰到企係地鐵，抓住手柄訓著左，
然後車停成個人向前仆，身心好疲累。
於是膽粗粗就遞左辭職信裸辭。
裸辭其實真係要好大勇氣，
就算我幾鍾意做PR，個一刻我發覺我自己係好需要停一停，
於是我就襯自己個時後生，諗住試下第二個行業。
朋友問我，其實我仲有咩興趣？
講真，我真係好想留翻係公關行業，
不過我個刻俾個衰同事搞到我自己懷疑人生😂
好傻可？最終我望住個jobsdb，
見到乜工都send一餐，真係岩價都唔放過。
好快咁，我就收到啲面試既機會，
有上到去原來做布trading但佢啲廣東話我完全聽唔明既，
有上到去做production但又講唔出佢做啲乜客既，
有上到去叫你賣基金但我孤陋寡聞連公司名都無聽過既，
個時我好保守，於是就去某間本地大型連鎖珠寶公司去in做sell屎。
你實話大學生畢業使乜去做sell屎，
其實我個時又覺得無乜野呀，都係一份工，
我份人又鍾意講野，又賣「高級」珠寶播，
諗諗下可能係我踏入高級時裝行業既踏腳石，
因為我身邊好多朋友話入大brand做野收佣好可觀，
咁我本身又好鐘意啲fashion lifestyle野，
入唔到啲國際品牌，咪做住本地既先囉，
無野嫁，馬死落地行，
於是我就膽粗粗去咗個interview。
不過本地品牌真係好有本地特色，
完全唔能夠同國際品牌去做比較，
我唔知係咪可以話係好彩，
定係間公司無制度，當日面試個陣，
我本來係in做sell屎，好簡單咁佢問下我點解想轉行呀，
有無零售經驗咁呀。
突然間，佢就問我「其實我地有另一個職位，唔知你有無興趣」，
我當然問佢係咩職位啦。
佢答我，「行政助理」。
行政助理？Managment Trainee播。
Management Trainee既面試唔係要過五關斬六將嫁咩？
點解咁hea既？
不過我無諗好多野，當時淨係關心人工多啲，
位office同事立即開左個excel話我知大約我一個搵幾多人工，
叫做比我以前好少少，可以接受，
跟住就叫我去考左個筆試。
筆試內容就好似啲中三考試題目咁，
類似俾左個黃金造型飾品我，問我點係media sell咁，
俾60分鐘叫我寫頁紙，好彩我讀文商科，
寫開essay😂
再叫我等左廿分鐘，就話俾offer我...
當時諗都好既，反正我又裸辭，咪試下囉。
後來做落先發覺，呢份工呢間公司都幾伏下，
真係血汗史咁樣，
所以我一直都唔敢同人講...
如果大家有興趣想繼續聽落去，俾多啲likes呢個post，
等我知道有人想聽落去😂
我就同大家繼續講係呢間所謂既本地大型珠寶公司既經歷。
安德魯艾豬：https://www.instagram.com/a.drewy/
PS呢套制服最後都跟左我四個月😂
Search